දෙවොල් බාගය -19 වෙනි කොටස

දහනවවෙනි කොටස

පහතරට දෙවොල් මඩු ශාන්තිකර්මයේ පූජාවිධි රටාවේ සව්ස්තරාත්මක විග්‍රහය 

තුන් බාගයේ දෙවියන් වෙනුවෙන් කරනු ලබන මඩු ශාන්තිකර්මයේ අවසන් කොටස වන දෙවොල් බාගයට අයත් වන පෙලපාළි මෙම කාලපරාසය තුලදී සිදුකල යුතුය.ඒ අනුව දෙවොල් බාගය සදහා අයත් වන

1. මිල්ල කැපීම
2. ගිනි කුරුම්බර පිදේනි දීම
3. පන්දම් දොලහා දීම
4. මැල පෑගීම
5. දෙවොල් නැටීම
6. දෙවොල් ගොඩබැසීම පෙලපාළිවේ.

මෙම පෙලපාළි සිදු කිරීමේදී ගුරුකුලයන්ට අනුව අනුපිලිවෙලෙහි වෙනස්කම් ඇතිවිය හැකිය .ගිනි මඩු ශාන්තිකර්මයක් නම් මෙම වෙනස්කම් ඉතාම පැහැදිලි ලෙසින් දැකීමට හැකිවේ.එසේම ගිනිමඩු ශාන්තිකර්මයකදී නම් පෙර දින සවස් බාගයේදී මිල්ල කැපීම සාමාන්‍ය සිරිතකි .ගිනි මඩුවකදී විශාල ගිනි මැලයක් බාවිතා කරන බැවින් එම මැලය ඇවිලී ගිනි පෑගීමට සුදුසු ආකාරයට සකසා ගතයුතු බැවින් පෙර දින මිල්ල කැපීම සිදුකර මැලය ගසා ගිනි දැල්වීම සිදුකරනු ලැබේ.

 

Mahanama College Dewolmadu Shanthikarmaya

දෙවොල් දෙවි ගොඩබැසීම නර්තනය

 

ඊට අමතරව තුන් බාගයට මැල තුනක් දෙන්නේ නම් එවිටද පෙරදින සැන්දෑවේ මිල්ල කැපීම සිදුකරනු ලැබේ.එසේ නොවන්නේනම් දෙවොල් බාගයට අයත් වන කාලපරාසය තුලදී මිල්ල කැපීම පෙලපාළිය සිදුකල යුතුයි .එය මඩුයාගවල සාමාන්‍ය ක්‍රමවේදයයි.එම ක්‍රමය අනුව මේ පෙලපාළිය සිදුකරනු ලබන සහ සිදු නොකරනු ලබන ප්‍රදේශ මෙන්ම ගුරුකුලයන්ද ඇත .රයිගම් කෝරළය හේවාගම් කෝරළය සහ සියනෑ කෝරළයේ සමහර අයවලුන් මෙම මිල්ල කැපීම පෙරදින සැන්දෑවේ සිදුකිරීම කරනු ලැබේ .පානදුර තොටමුන කෝරළය පස්දුන් කෝරළය සහ සියනෑ කෝරළයේ එක් කොටසකද අළුත්කූරු කෝරළයේද දෙවොල් බාගය කාලපරාසය තුලදී නිසියාකාරව මිල්ල කැපීම සිදුකරනු ලැබේ .කෙසේ මෙම ක්‍රියාව සිදු කලත් මෙහි පරමාර්ථය වනුයේ දෙවියන් උදෙසා ගිනි පෑගීමේ ක්‍රියාවලිය මෙන්ම එය පත්තිනි දෙවියන් විසින් දෙවොල් කුමරවරුන් ලක් දිවට ගොඩබැසීමේදී මවන ලද ගිනිවැට හත සංකේතවත් කිරීමයි.මෙම මිල්ල කැපීම පෙලපාළිය පිලිබදව මීට ප්‍රථම කොටස් තුනක සවිස්තරාත්මක හැදින්වීක් සහිත ලිපියක් මෙම සමාජ මාධ්‍යය තුලින්ම ඉදිරිපත් කරනු ලැබූ බවත් එය පරිහරණය කරන ලෙසත් ඔබට සිහිපත් කරමි.එසේම දෙවොල් බාගය තුලදී පූජාර්ථය මුල්කර ගනිමින් රගදක්වනු ලබන දෙවොල් නර්තනය පිලිබදවද කොටස් පහකින් සමන්විත සවිස්තරාත්මක ලිපි පෙලක්ද ඉදිරිපත් කර ඇති බැවින් එම ලිපි පෙලද මෙම කොටසට අයත් බැවින් එයද බාවිතා කරන මෙන් ඔබට මතක්කර සිටිමි. එයට අමතරව මෙහි සදහන්කර තිබෙන දෙවොල් ගොඩබැසීම පන්දම් දොලහා දීම සහ ගිනිකුරුම්බර පිදේනි මුට්ටිය කැප කිරීම පිලිබදව තොරතුරු ඔබට ඉදිරිපත් කරන්නෙමු 

 

දෙවොල් ගොඩ බැසීම

දෙවොල් දෙවියන් උදෙසා පූජාර්ථය පදනම් කරගනිමින් ඉදිරිපත් කරනු ලැබූ නර්තනය අවසන් කරනු ලබන්නේ මෙම දෙවොල් ගොඩ බැසීම නම් නාට්‍යමය පෙලපාළියද ඉදිරිපත් කිරීමෙන් අනතුරුවය.දෙවොල් පද නැටීම කර අවසානයේ පිවිසෙනුයේ මෙම කොටසටය.මේ පෙලපාළි අංගයෙන් ඉදිරිපත් කරනු ලබන්නේ දෙවොල් කුමාරවරුන් සත් දෙනා සිංහල රටට ගොඩබසින ලද ආකාරයයි.මෙහිදී දෙවොල් දෙවියන්ගේ උපත් කතාවද පෙර ආත්ම භවයේ කතාවන්ද ඇතුළත්ව මෙම පෙලපාළිය රග දක්වනු ලැබේ .මෙහි උපත් කතාව පිලිබදව තොරතුරු දෙවොල් නර්තනය සහ සම්බන්ධ ලිපි පෙලෙහි අන්තර්ගතව ඇත . දෙවොල් කුමාරවරු සත්දෙනා ලංකාවේ තිබූ තොටමුණු නවයකින් ගොඩබැසීමට උත්සාහ දැරූවද එම ස්ථාන ආරක්ෂා කරනු ලබන දෙවිවරු විසින් මෙම පරදේශක්කාරයින් හට ලංකා භූමියට ගොඩබැසීමට නොදුන්නහ.

 

අවසන් උත්සාහය ලෙසින් දසවෙනි තොටමුන සීනිගමට මේ අයවලුන් පැමින තමන්ගේ පෙර සම්බන්ධතාවයන් පවසමින් සිංහල දේශයට ගොඩ බැසීමට ඉඩ සලසා දෙනමෙන් ඉල්ලීමක් සිදුකරනු ලැබීය .එහිදී පත්තිනි දෙවියන් එම ඉල්ලීමට එකගව මේ අයවලුන්ගේ තෙදබල පරීක්ෂා කිරීමට සිතා තමන්ගේ බලය පෙන්වා වෙරළෙහි ගිනිවැට හතක් මවා එය තරනය කරමින් ගොඩබැසීමට සැලැස්වීය.ඒ අනුව දෙවොල් කුමාරවරුන් එම අභියෝගය ජය ගනිමින් ගිනිකදු තරනය කරමින් සිංහල රටට ගොඩබැසීම සිදුවිය .මෙම කතාව නාට්‍යමය ආකාරයට ඉදිරිපත් කිරීම මෙලෙස දෙවොල් ගොඩබැසීම පෙලපාළිය ලෙසින් ඉදිරිපත් කරනු ලැබේ .මෙහිදී නිසියාකාරව භාෂාව කතා කිරීමට නොහැකි ආකාරයක් බාවිතා කරන දෙබස් තුලින් පිලිබිබු කෙරේ .එසේම ප්‍රචලිතව නව තොටමුන ලෙසින් බාවිතයේ තිබුනද මෙම දෙවොල් ගොඩබැසීමේදී තොටමුනු දහයක් බාවිතා කරනු ලැබේ .ඒ අනුව කිවයුතු වන්නේ නව තොටමුන ලෙසින් බාවිතා කරන ලද මුත් ඊට වැඩි තොටමුනු ප්‍රමානයක් තිබූ බවකි. මෙම කතා ප්‍රවෘත්තිය නාට්‍යමය ස්වරූපයකින් දෙබස් බාවිතා කරමින් ඉදිරිපත් කරනු ලැබූවද කවි ගායනාවන් තුලින්ද මෙය ප්‍රකාශකර සිටීම සාමාන්‍ය ක්‍රමවේදයයි.

 

මෙකප පලමුව ඉපිද කකුසද දහම්

රැකි මුනි ලොව්තු රා

එකල කුමරුන් සත්දෙනෙක් විය සිටු

කුලෙක පිලිසිදි ව රා

පිනට තම සිත නැමී එකලට දෙමින්

කඨිනය එකව රා

පතා දෙවි වෙමි සිතා සත්දෙන දීපු

කඨිනය අමයු රා

තවත් මණිමේකලා නම් පුර බමුණු

කුලයක ඉපදු නේ

රුවත් යව්වන සෝබනාවෙන් ලියක්

එනුවර ඇතිවු නේ

ගෙනත්ලා නෙක එමී අඹයද පුදා

මුනිදුට විගසි නේ

මමත් පත්තිනි දෙවි කෙනෙක් වෙමි

සිතා ඇය විවරන ගෙ නේ

පැතූ විවරන අසා සත්දෙන කුමරු

ඇවිදින් මුනිදු වැද සි ට

නුඹද පත්තිනි දෙවියො වෙන කල අපි

දෙවොල් දෙවි වෙලා එකල ට

නුඹද අක්කා සිටින තැනකට සොයා

ඇවිදින් අපිත් එමවි ට

කියා අටදෙන ගිවිස්සා ගති එකම

මඩුවේ පුද ලබන්න ට 

 

මේ ආකාරයට ගයනාවන් මගින්ද පෙර පුවත ගෙනහැර දක්වමින් දෙවොල් ගොඩබැසීම කතාංගය ඉදිරිපත් කරනු ලැබේ . මෙසේ ගොඩබැසීම සිදු කිරීමෙන් පසුව ආතුර පක්ෂයට දෙවොල් සව්දම නටා පඩුරු ලබා ගැනීමෙන් පසුව ආතුර පක්ෂයට සිරසපාද කවි හෝ සෙත්කවි කියා ආශීර්වාද කිරීමෙන් පසු මෙම පෙලපාළිය එනම් දෙවොල් නර්තනය සහ දෙවොල් ගොඩබැසීම අවසන් කෙරේ.

 

දෙවොල් සව්දම

සිරස දැරූ ජගලත් රතු තොප්පිද සවන

දෙකන් බැදි කාගුල් තුනකි න්

ඇගට අදින රතු සැට්ට කබායද ඇද

සැරසී රගදෙන විලසි න්

දෑත ගිගිරිලා දෙපය සිලම්බුද ලවමින්

රගනා සැටි බලමි න්

කාට නටන්ඩත් බැරිවෙයි සකියනි

දෙවොල් මෙසව්දම නැටුවෝති න්

 

සව්දම් පද කොටස

කිතක් කිතකතක තරිකඩ කඩතක තකු දිකු

තරිකඩ තත් දිත් තොං නං ,සතක් පහුරු පැද

වැඩලා මෙකරට සීනිගමට වැඩලා දෙවිදුන්

ඇතත් වරද හැර පිං අරගෙන ඔබ උවදුරු

දුරලා වඩිනුය සැනෙකින්,කිතක් කිතකතක

තරිකඩ කඩතක ඔන්න නටමි මම දෙවොල්

මෙ සව්දම් . 

 

ඉහත සව්දම නටා පඩුරු ලබාගෙන සෙත් කිරීමෙන් පසු මෙම පෙලපාළිය අවසන් කෙරේ . 

 

...................................................................................

ප්‍රවීණ පාරම්පරික නර්තන සහ වාදන ශිල්පී 

දේශබන්දු කේ.ඩී.නිහාල් චන්ද්‍රසිරි (BFA )

....................................................................................