පන්දම් දොලහා දීම (විලක්කු එළිය ඔප්පු දීම ) - 20 වෙනි කොටස

විසිවෙනි කොටස

පහතරට දෙවොල් මඩු ශාන්තිකර්මයේ පූජාවිධි රටාවේ සව්ස්තරාත්මක විග්‍රහය

මෙම පෙලපාළිය සිදුකරනු ලබන්නේ ගිනිකුරුම්බර ප්‍රධාන කර ගනිමින් දෙවොල් දෙවියන්ගේ නාමයෙන් පත්තිනි දෙවියන් සිහිපත් කිරීමෙන් දොලහා දෙවියන් උදෙසාය. සියනෑ කෝරළය සහ අළුත්කූරු කෝරළය තුල මෙම පෙලපාළිය විශේෂ වශයෙන් දකින්නට ලැබේ .ගිනිකුරුම්බර පිදේනි මුට්ටිය පිදීමට පලමුව ගිනිකුරුම්බර දේවතාවාගේ ආවේශය ලබා ගනිමින් මේ කරයුත්ත සිදු කිරීම පුරාණ චාරිත්‍රයයි.දැනුදූ සමහර අවස්ථාවලදී පැරණි ක්‍රමවේදය අනුව මෙම පෙලපාළිය සිදුකරනු ලැබේ. බොහෝදුරට වර්තමානයේදී ආවේශ වීමකින් තොරව විලක්කු එළිය ඔප්පු කිරීම දකින්නට ඇතත් කලාතුරකින් හෝ දකින්නට ලැබීම වාසනාවකි.

 

Thelme Dance (තෙල්මේ නර්තනය 01 කොටස)

Thelme Dance (තෙල්මේ නර්තනය 02 කොටස)

https://youtu.be/ljI3ed7p_Ow

 

පුරාණ ක්‍රමවේදයට අනුව මෙම පෙලපාළියේදී ආතුර පක්ෂයට පේනයක් කීම සිදුකෙරේ .එය සුවිශේෂි ලක්ෂණයකි .එම පේනය කීම මෙම පෙලපාළිය තුලදී සිදුකල යුතු අනිවාර්ය අංගයකි.මෙහිදී ගිනිකුරුම්බර ආවේශවීම තුලින් මඩු ශාන්තිකර්මය කරවන දායක මණ්ඩලයට පමනක් නොව පැමින සිටින අයවලුන් කිහිප දෙනෙකුට උවත් පේන ඇසීමේ අවස්ථාව තිබුනි.නමුදු වර්තමානයේ එම අවස්ථාව බැතිමතුන් ගෙන් ගිලිහීගොස් ඇත .ආවේශවීම තුලින් මෙම පෙලපාළිය සිදු කරනු ලබන්නේද ඉතාම කලාතුරකින් වීම මෙහි තිබූ ආශ්චර්‍යමත් බව බිදීයාමකි.මෙසේ සිදුවීම තුලින් පුරාණ චාරිත්‍ර ගිලිහෙමින් නවීන රටාවන් නිර්මාණයවීමක් දකින්නට ලැබීමත් කණගාටුවට කාරනාවකි .මෙම පෙලපාළිය තුලදී සිදුකරනු ලබන අතීත සිහිගැන්වීම වනුයේ සේරමාන් රජුන්ගේ සිරසෙහි රෝගය දුරුකිරීමේ මඩු මංගල්ල්‍යයට පැමිණි රජවරු දොලොස්දෙනා දෙපසේ සිටිමින් දොලහා පන්දම් අතැතිව අතනගා ආවැඩීමේ ක්‍රියාවලිය සිහිපත් කිරීමයි.එම ක්‍රියාවලියේ අනුහසින් අදද මෙම ආතුර පක්ෂයට සෙත් ශාන්ති සලසා ආශීර්වාද කිරීමේ අභිචාර ක්‍රමවේදයක් මෙහි අන්තර්ගතව තිබේ.

 

Thelme Dance (part 01) තෙල්මේ

තෙල්මේ නර්තනය (part 02) 

 

Thelme Dance (part 03) 

පන්දම් දොලහා දීම දොලහා දෙවියන් පත්තිනි දෙවොල් සහ ගිනිකුරුම්බර දෙවියන් යන සිව් දෙනෙකුගෙන් සමන්විත පෙලපාළියක් ලෙසින් හදුන්වා දීමක් සිදුකරනු ලැබූ හෙයින් එය විස්තර කරදිය යුතුය.එසේ කලයුතු වන්නේ දෙවි දොලසක් පිලිබදව බහුතරයක් දන්නේ තෙල්මේ නර්තනය තුලදී පුද පූජාවට භාජනය වන දොලහා දෙවියන් පිලිබදව පමනක් වීම නිසාවෙනි .මඩු ශාන්තිකර්ම වලදී දෙවොල් බාගය කාලපරාසය තුලදී පන්දම් දොලහා දීමේදී එම පන්දම් දොලහාට අරක්ගත් දෙවියන් දොලොස් දෙනෙකු සිටින බව කිවයුතු කරුනකි .ඒ අනුව පත්තිනි දෙවියන් සතුව පන්දම් පහලොවක් තිබුන බවත් එයින් පන්දම් තුනක් ගරා දේවතාවාට ලබාදී එයින් සෙත් කිරීමේ බලය ඔහුට පවරනු ලැබීය.එය කීල පන්දම ලෙසින් නම් කෙරේ.

 

පත්තිනි දෙවියන් සතුවූ ඉතිරි පන්දම් දොලසට දෙවියන් දොලොස් දෙනෙකු ආදේශ කරමින් එම පන්දම් දොලසට අරක්ගත් දෙවියන් ගේ වරමින් සේරමාන් රජුට සෙත්පතා ආශීර්වාද කරනු ලැබූ මූලික කාරනාව පිලිබිඹු කෙරේ. එමෙන්ම මෙම පන්දම් දොලහා දීම කරනු ලබනුයේ ගිනිකුරුම්බර ආවේශවීම තුලින් නිසාවෙන්ම එය දෙවොල් බාගය කාලපරාසය තුලදී සිදුකරනු ලබන දෙවොල් දෙවියන්ට අයත් පූජාවිධි රටාවක් ලෙසින්ම පවත්වාගෙන එනු ලබන්නකි. එලෙස පැවසීමට කරුනක් වනුයේ පත්තිනි බාගය තුලදීද මේ ආකාරයටම පන්දම් දොලහා දීමක් සිදුකරනු ලබන බැවිනි.

 

එසේම එයද ආවේශවීමකින් සිදුකරනු ලබන බැවින්ද එකහා සමානතාවයක් පෙන්නුම් කරන නිසාද පත්තිනි බාගය තුලදී පත්තිනි දෙවියන් උදෙසාද දෙවොල් බාගය තුලදී දෙවොල් දෙවියන් උදෙසාද ලෙසින් ක්‍රියාවලිය කරන රටාව තුලින් වෙන්කර පෙන්වාදිය හැකි වේ.පත්තිනි දෙවියන් මෙම පන්දම් දොලහා පෙලපාළිය තුලදී සදහන් උවත් කරනු ලබන රටාවේ තිබෙන පූජනීයත්වය දෙවොල් මුල්කර ගනිමින් සිදුකරනු ලැබේ .එසේම පැවසීමට කාරනාවන් වනුයේ ගිනිකුරුම්බර යනුවෙන් හදුන්වනුයේ කුරුම්බරයින්ගේ ප්‍රධානියා ලෙසින් පූජාවට භාජනයවී ඇති හෙයිනි .මෙම කුරුම්බර ප්‍රධානියා යනු දෙවොල් දෙවියන්ම බව පිලිගැනීමට ලක්වී තිබීම තුලින් දොලහා පන්දම් පූජාව දෙවොල් දෙවියන්ගේම පූජාවක් බව පිලිගත යුතුව පවතී.

 

පන්දම් දොලහේ කවි ගායනාවන් 

සුරන් බඹ සින්ද මේ

වරන් ගෙන වැඩිය අන්ද මේ

නරන් සිරි වින්ද මේ

කියන් සෙත්කවි දොලහා පන්ද මේ

පන්දම් දොලස ය න

පුදදෙන ලකුණු වෙන වෙ න

ඇති රග පිලිවෙලි න

උපත පවසන් මදක් කවියෙ න

දඹදිව පෙර දව ස

බමුණෝ යාග කල ලෙ ස

මෙහි පන්දම් දොල ස

දුන්නු සිරිලක පැවත එන ලෙ ස

සේරමන් නිරිදු ට

සිරසේ රෝග වන් වි ට

ඒ දෝස හරින ට

එදා දුන්නේ දොලහා පුදකො ට

පඩුවස් නිරිදු හ ට

දිවි දොස් අරින යාගෙ ට

සත් දවස නිමකො ට

එදා දුන්නේ දොලහා පුදකො ට

පත් යස සුරපති වරමින් සැප සේ

සිත් ලෙස පිරිවර සැදෙමින් දෙප සේ

පත්තිනි දෙවි සද නමදින් සතො සේ

සෙත් කවි පවසන් පන්දම් දොල සේ

ඕං කියන දෙවි රන් පොත විදිමි න

මෙපන් දහස් ගිනිජල් වට පැතිරෙ න

මාන්ජේරි නාලොවේ උපන් තැ න

ඕං කියන දෙවියන්ගේ වරමි න

පලමුව ගිනි ජලයෙන් ඉපදුන ලෙ ස

ලැබෙන රුදුරු ගිනි පන්දම් පසලො ස

එවෙනි රුදුරු පන්දම් අවුලන ලෙ ස

ලැබුනි රුදුරු දෙවතාවෝ පසලො ස

දිනක් කදිර දෙවි දකිනට වඩි තී

තුනක් එපන්දම් රකුසුට දෙව තී

එයක් රකුසු හට කෙලිපුද දෙව තී

එවක් පටන් දොලසේ නම පව තී

යාරජ යුවරජ සමග කතා කො ට

ගොළු සාතාරජ වැඩ රඹ තොරන ට

දෙවොල් සමග වැඩලා ගිනි කෙලිය ට

අවොල් දෙවොල් හැර සෙතදෙන් අද සි ට

වැන්දෙමි දෙවියන් එන්ඩ කමා වේ

ඉන්දෙමි තොරනොව එහි නොපමා වේ

නන්දන තෙදබල දෙවොල් තුමා වේ

පන්දම් දොලසම සුරතට වැඩු වේ

ඕංකාල ඉන්ද්‍රකාල අග්නිකාල දෙවි බල තී

වජ්ජ්‍රකාල භූතකාල ශුද්ධකාල දෙවි බල තී

දකුණු දෙසින් මේපන්දම් හයගෙන පනිවිඩ

කර තී

දකුණු සුරත පන්දම් ගෙන පතිනි දෙවියො

ආවඩ තී

හ්‍රීං අග්නි ඉසුරු අග්නි ත්‍රිවිධ අග්නි

දෙවි බල තී

නාග අග්නි වදුරු අග්නි දෙවොල් අග්නි

දෙවි බල තී

වාම දෙසේ මේපන්දම් හයගෙන පනිවිඩ

කර තී

වාම සුරත පන්දම් ගෙන පතිනි දෙවියො

ආවඩ තී

මෙගිනි පන්දම් වැ ට

පැන් ඉස නිවූ ලෙස ට

සිසිල සිරි බෝකො ට

ආසිරි දෙවා දෙවියෝ බෝකො ට 

 

....................................................................................

ප්‍රවීණ පාරම්පරික නර්තන සහ වාදන ශිල්පී

දේශබන්දු කේ.ඩී.නිහාල් චන්ද්‍රසිරි (BFA )

....................................................................................